كلامي معاك

كلامي معاك ...

كلام الغيمة للنسـمات

حكاية الليل وكت يشتاق

يلاقي القمرة دون ميـعاد

ولهف النيل عشان يرحل

يوصّل شوقـو للغيمات

وينضم كل نجوم سهرك

عقود لي موسـم الميلاد

ويــوم نعبر بحور الريد

شواطئ الفرحة بيك تزداد

وليك بقول :-

كلامي معاك حروف جايات

حنيني اليك عشان سفرك

بيبقى الزاد

سلامي عليك من القلب

المعاك سافر بدون ميقات

وفاض الشوق بدون مايقيف

قطر في الدمــوع أوراد

وسبح في جـمال رسمك

قال دعواتو في الصلوات

اريت حبك يكون همـي

وريدتك تبقى في دمي

تزين للجـمـال أعيـاد

انا المخلوق عشان أهواك

أنا الخلاني معنى الريـد

فواصل في خدود شمعات

ترسل ليك مع الجايين

خواطر اللهفة والحكوات

ولمن تسمعي الكلمات

أمانة عليك

.. ترسلي لي

وهج عينيك مع النجمات.

بتلقي الضي وصل حدي

ملفّح بي صدى الغنوات

عشان يرسم أماني هواك

يسـطر اروع اللحظات

وتفضل في مداخل الروح

خطوط حبك بدون آهات