كــان مختلف

أنا عارف إنو الحب جميل ... بس إنتو خاربين سمعتو

الحب وفا و إحساس نبيل..........بس إنتو أسباب دمعتو

ولو الحبايب زيكم.................كل يوم بزيد في لوعتو

أنا عارف إنو الحب جميل .. كون من مشاعر و من وفى

رقة و محنة و حس شفيف .. حضن المحبين و الدفا

لكنو بيكم نجمو غاب .. صدق العيون ذاتو إختفى

ضيعتو معنى الريدة ليه.. ليه الوصال يصبح جفا

الحب زمان كان مختلف .. كان بيهو نتحدى الظروف

كان أسمى من موعد غرام ..كان أحلى من كل الحروف

بس بيكم إتغير خلاص ...و إتخت صورة على الرفوف

بتجيبوا للريدة الكلام .. بتجيبو للحب الكسوف

الحب ده حقو نغيرو .. بي كلمة من خارج الحدود

و الريده ذاتا نبدلا .. و نقول ده هو الريد الجديد

علشان يكون الحب وطن ..و الزيكم يبعد بعيد

و نعلم الناس كيف تحب .. و نعلم الناس كيف تريد