اخـــر قــــرار

يا ليل مساهر شان شقاي مليت معاني الإنكســـار
جاييك معاي شايل خبر أسمع خلاص آخر قـــرار

سلمت أوراق الهموم وكشفت عن فرحي الستـــار
قررت أنفيهو الحزن من دنيتي والغي الحصـــار

قررت إعدام الظلام وإطلاق سراح شمس النهـــار
أعذرني يا قلبي البرئ لو كان بكفي الإعتـــذار

أنا كنت ساجنك بالسنين كم طال عليك الإنتظـــار
لكن خلاص صدر الحكم وأعلنت حالة الإنتصـــار

أفتح ملفات الغرام وأنفض عن الريده الغبـــار
ياقلبي عيش أيام هناك افرح مع الزمن الغفـــار

لو قلت ما بتعفي الظلم لي أي زول في وفاك جــار
أوقلت مابتنسى الحصل من ناس هدوك في الدنيا نـــار

حتهد جواك قصر السماح تنسى الصباح شان تلقى تـــار
اعرف زمنا صعب كعب أنساهو ما تدي إعتبـــار

يكفيك كم ضقت التعب وعانيت قساوة الليل مـــرار
أهدم سجون الإعتقال وأبني الحنان جـــواك دار

شيد مساجد روعه فيك وإتوضأ من طيبة البحـــار
انوي الصلاه وقوم إستخير خليهو لي الله الخيـــار

خليك دائما" مبتسم والحب جواك مرفوع شعـــار
إتذكر إنو في ناس هناك راجين رجوعك بإفتخـــار