رحــــــــــــــــــــاب

الإسـم : رحـاب عمـر كشـان
العمـر : تسعـه أعـوام
توفيـت نتيجـة إصابتهـا بمرض السرطـان
وذلك في يـوم السبـت 2/شوال 1431ه (ثانـي أيام عيـد الفطر المبـارك)
الموافق 11/سبتمبـر 2010

اللهـم تقبلهـا قبولا حسنـا" .. وإجعـل صبـر أهلهـا مغفرة" لهـم يارب

اللهـم اشفـي كل أطفالـنا وأطفـال المسلميـن .. وكبارنـا يـارب العالميـن

قصيدة رحـاب كلمـات إسراء كشـان هي رسالـه بلسان كل طفل مريـض .. إليكم
.................................................. ............

أنا أختكم في الله رحـاب جيت أحكي قصتي وأشرحــا

عمري تسعه سنين عذاب والباقي ضاع غير مصلحــه

مرضي البياكل في العضام خلى الرجول متكسحــه

وأنا حالي زي حال المعــاي.............!

عصفوره مكسورة جناح ما فاهمه إيه أسباب أســاي

بس خايفه من مر الألم وخوفي يمه يزيد شقــاي

أنا خايفه من حقن الضهر .. وخايفه من حت الشعر .. أنا خايفه يمه أكون بــراي

يايمه بقراها الدروس حليني من وجعي الجــواي

يايمه ما بمشي الشمس فكيني من وجعي الجــواي

يايمه بسمع للكلام يايمه توبه خلاص كفــاي...........

انا الوحيده الباقيه ليك يايمه مين جنبك ســواي

وتقول لي أصبري يارحاب .. أصبري ياجنــاي

أنا فيك كترت الصبر أرجيهو ده المن الله جــاي

والله لو في إيدي شي بقطع كبيدتي أديها ليــك

لو كان علاجك عافيتي ما كنت بتأخر عليــك

أبكي وأقول يا أمــي بس دسيني فيــك

يايمه بس ضاريني بيــك

ما دايره أشوف دمعك بسيل وإيديني عاجزات تمسحــا

أنا جايه في زمنا" غلط غلطاتو فيني بصححــا

مكتوب نصيبي أعيش عذاب .. والعافيه ديمه مجرحــه
بعد المرض فاض بينا زاد شال من ملامحنا الكتيــر

دخلت لي مشفا" كبيــر قالوا العلاج فيو ما وفيــر

لكن بخففوا للألم والباقي بيو ربك قديــر

يومي البفوت غرف الكشف والخوف مطير قلبي طيــر
بتمنى أبدا" ما يعود يوما" صعب بالحيل عسيــر

يرجعوني على الكتف محرومه حتى من المسيــر

كل المعاي أنا حالي زي حالم وأخيــر

أسأل الدكتوره وين صاحبي الهنا شايفاهو ما في على السريــر ..!؟؟
يقولوا مات....!!!
يا خاله هوي المات منو!!؟
كيفن يموت ولدا" صغيــر!!؟
يا خاله هوي المات منو!!؟
كيفن يموت صوت الضميــر!!؟
يا خاله هوي المات منو!!؟
كيفن يموت فرحا" ضريــر!!؟
قلبو زي نور الصباح وأحلامو زي شمس العصير

كل يوم بموت طفلا" مريض وموعودنا بي نفس المصيــر

أم بتبكي فراق جناها و والدا" ماليهو حيــر

لو كان ضمير الناس بفوق أو مره بس في يوم صحــى

كان وقفتو على العوج وبإيديكم إنتو نصلحــا

ما كانوا أطفالنا الصغار فقدوا السنين المفرحــه

ما كان مشينا على الضياع وبدل الملاهي المشرحــه

أنا راضيه عاد بي البي بقت شجرة وداعي ملقحــه

ممدوده في نص السراب قمريه راجيه البضبحــا

والليله زار خبرا" أليم ..... رحاب حتخلي مطارحــا

الناس بتلبس في الجديد وأنا كفني كان الملفحــه

يايمه أمسكي في الصبر ... إختارني الرحيم ليك مربحــه

إنسد باب بيجيب رحاب إلا الكريم أبوابو لسه مفتحــه

مادام لينا رب خالق عظيم والشينه قادر يسمحــا

يا أخواني تب ما تشيلوا هم كل زول بياكل البقدحــا