فرح القصائد

فرح القصائد
كلمات / مدني النخلي
=========
لا حلم لا كان خيال
لا وعد لا جيت اطوفا
دي البنية الكستا ليها
ومنتظر طلة طيوفا
حلوة خضرت الصحاري
ورشت الغيمة الولوفة
جرتقت فرح القصائد
لونت بالود طيوفا
دي البنية الدابا تابة
الله يحفظ لي شابابا

صفوة الغيد الرشيقة ..
اتقدمت سرب الحسان ..
لما رقصت زي فراشة ..
سيج الفرح المكان ..
هبت النسمة الندية ..
الليلة زغرد يا زمان ..
دي الوحيدة الضاوية ليلنا ..
وراشة في الدنيا الحنان

يا مساء الحب وبهجة
يا صباح النور ووردة
يا حدائق عامرة خضرة
يا عيون ضاحكات مودة
من متين أنا في إنتظارك
والزمن بي عُمري عدَّى
ما غريبة الليلة ترجع
يا فرح خاصمني مُدّة
دي البنية الدابا تابة
جاية تفرح بي شبابا
ويالله تفرح بي شبابا