وداع زيدان ابراهيم

وداع زيدان ابراهيم
نضال حسن الحاج

(لاهماك عذابنا ) وراك
ولاك (أول حبيب) ترحل..
تسوق(دنيا المحبه) قفاك
فيا الـ(وسط الزهور ) طليت.. وعافية روحنا جاتنا حداك
ويا(حبة فرح ) مرقت ..
تعزي علي البكا الأفاك
خباري وها الوطن شاهد ..
(بنادي عليك) وبترجاك
تجينا (كنوز محبه) وريد ..
(فراش القاش) يغني معاك
***
(أكون فرحان) وكل الكون يصفق لوتطل في يوم ...
بقول لو(هانت الأيام) ..
كفت وش النهار النوم
(بقيت ظالم) نسيت الناس ... بلاقيك والسماح بالكوم
بقول لك(داوي ناري) تعال ... وشل العبره في الحلقوم
تعال تاتي القصيده نقوم ..
***
(جميلا ماسألنا) برا ...
يقيم في الذات ويتمدد
بنينا معاهو(قصر الشوق) ...
أقمنا علي المآسي الحد
رحل (في الليله ديك) فنان ...
وراو حيل الأغاني برد
سكن فوق القلوب مرتاح ...
أحبك (لو احبك) جد،،
***
(قلبك ليه تبدل) يعني..
ماقاوم أذاهو رعاك؟
(صبح ريدك حياة) الشوف
وأبصرت الكتابه عماك
خلاس يا(الزاهي لونك ) حن
خلاس ارحم قلب مضناك،،